ضحك السواد

عربات زمان
فلكسواجن أو.. سيارة الشعب

بقلم- طارق اللمين

اشتهرت في السودان ولا تزال العربة فلوكس واجن أو فلوكس فاجن وتعني باللغة الألمانية سيارة الشعب.. وقد قام حزب العمال الألماني في سابقة لا تعرفها دول عالمنا الثالث قام بمبادرة تأسيس شركة فلوكس واجن في العام ١٩٣٧ في مقاطعة سكسونيا السفلى بألمانيا فأصبحت الشركة التي تنامت وعمت شهرتها الآفاق منذ عهد الزعيم النازي هتلر لتصبح ثاني شركة في العالم الأكثر مبيعات بعد تويوتا الشهيرة.
تلقف السودانيون العربة فلكسواجن وقاموا بابتكار اسم دلع لها فسموها ب(الفلوكة) وأحبها أطفال السودان كثيرا فسموها ب(القعونجة) وصارت حلم الشباب منذ خمسينيات القرن الماضي لجودتها وقلة أسعارها وخفة ظلها مما مكنها من احتلال مكانة عظيمة في قلوبهم ولا تزال.. حيث تنشط حديثا في السودان جمعية لمحبي سيارات فلكسواجن.. (بيتلز) وكانت ذات الجمعية هذه قد نظمت كرنفالا بهذه السيارات عند استقبال البلاد للرئيس الألماني الزائر مما جعله يقوم بكسر البروتوكول الرئاسي ويترجل سيرا على الأقدام ليشاهد هذه الموديلات المصطفة لاستقباله من فلكسواجن العريقة والتي غالبا ما تكون قد انقرضت في بلاده… كانت لمسة بارعة الجمال من هذه الجمعية اللطيفة.
حازت فلكسواجن على محبة شباب السودان كما ذكرنا منذ منتصف القرن الماضي وكانت عربة الفنانين والرياضيين والمحامين والشباب.. ثم عرف السودانيون منها موديلا آخر يشبه الحافلات يسمى (فلكسواجن بورمان) كان يستخدمه التجار قبل ظهور حافلات التايوتا اليابانية واشتهرت بامتلاكه واستخدامه طائفة الأقباط من التجار والصيادلة وقد عرفوا بحسن استخدامهم للسيارات حتى أصبح سماسرة وتجار العربات يحلفون (بالتقطعهم) بأن هذه العربة أو تلك كانت ملكاً لأحد الأقباط وذلك ترغيباً للزبون وتدليلاً على أنها بلا عيوب لما اشتهروا به من عناية فائقة بالسيارات.
وللفلوكة باب أمامي واحد على كل جانب مما يجعلها أكثر أماناً للأطفال في مقعدها الخلفي كما أنها عربة شديدة الأدب والانضباط لا تعرف (التفحيط) وسوء الأدب الذي تمادت في غيه السيارات الحديثة ومما يلفت الأنظار لكونه أمرا غير مألوف.. ان ماكينتها الصغيرة الرشيقة تقبع في الاتجاه الخلفي للسيارة اما بالاتجاه الأمامي فتوجد حقيبة متسعة تكفي لحمل كل مؤن الشهر الجديد من احتياجات المنزل لذا فهي عربة أسرية بامتياز.. كما أن الفلوكه لا تستخدم المياه في ماكيناتها حيث تخلو مما يسمى ب(اللديتر) ولم تكن سرعتها تصل إلى أكثر من ثمانين كيلو مترا في الساعة قبل أن تنتج هذه الشركة موديلات جديدة (سيئة الأدب) تصل سرعتها لمئات الكيلومترات في الساعة… ظلت العربة فلكسواجن من مظاهر ورموز الشارع السوداني القديم وعرف من السياسيين الذين كانوا يمتلكون الفلوكسواجن المرحوم عبد الخالق محجوب ومن المطربين حسن عطية ومن الرياضيين صديق منزول.
وحديثا اشتهر بامتلاكها والمحافظة عليها بحالة جديدة ولسنوات طويلة الأقباط وأشهر فولوسكواجن في الوسط الدرامي امتلكها عوض صديق ومن التشكيليين الفنان عصام عبد الحفيظ والموسيقى حرقل وكانت أشهر سياراتها الألمانية تسمى بالرقم ١٢٠٠ وهي المانية (امها بت عم ابوها) قبل أن تعقد شركة فلكسواجن شراكات إنتاج عالمية مع شركات برازيلية لتظهر للعلن موديلات اخرى بالأرقام ١٣٠٠ ثم ١٣٠٢ ثم ١٣٠٣ وغيرها التي تعتبر عربات (هاف كاست) المانية برازيلية – وبالعكس ثم تنتشر سريعاً في العراق وسوريا ومصر وإثيوبيا وبلاد أخرى عديدة.
لسودانيين كثر ذكريات حميمة مع هذه العربة اللطيفة ويشدهم ظهورها على الطرقات ويثير لديهم الأشجان والذكريات.. فهي عربة تستحق الاحتفاء والتكريم لما لعبته من دور عظيم في حياة السودانيين وشعوب أخرى كثيرة محبة لسيارة الشعب (فلكسواجن).
تمت
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

استدعاء عاجل من
مصطفى سيد أحمد في صبيحة الانقلاب
 بقلم- طارق الأمين

حين وقع انقلاب العصابة المشؤوم في ٣٠ يونيو كنت في عمر الزهور وأحمل كل عنفوان الصبا والشباب… كتبت قصيدة ساخرة قمت فيها بشتم العصابة في ذات مساء الانقلاب.. بعنوان (خشم البقرة) يقول مطلعها على ما أذكر:
تنضف شارع وتقفل نادي؟
نضاف الشارع.. ما ملحوق
بدل ماتنضف تحت الكرسي
نضف ياخي الكرسي الفوق
واعرف كرسي السلطة بكون
نضيف لمن مايكون مسروق
تسرق كرسي بتسرق دولة
وتسرق من شحاد في السوق
وجاي تفتش خشم البقرة؟
دا حال مايرضي ولا مخلوق
ما إن أطل صباح اليوم التالي السبت الأول من يوليو في ذلك العام البائس إلا وذهبت إلى نادي المكتبة القبطية بالخرطوم نهارا حيث كانت فرقتنا الهيلاهوب على موعد لتقديم عرض جماهيري في ذلك النهار وكان ضمن المشاركين فيه الفنان مصطفى سيداحمد.
صعدت لخشبة المسرح بعنفوان تلك اللحظات وغضبها وصرخت بقصيدتي الوليدة وسط حماس الجمهور ودهشته فالانقلاب لم تمض عليه ساعات قلائل… توقفت أنفاس الناس وعم الهدوء والحذر المكان وشهدت من على المسرح فنان الجماهير مصطفى سيد احمد وهو يتابع قصيدتي باهتمام بالغ مما شجعني على الأداء الهتافي وإشراك جمهور المتابعين في الأداء… وما أن أنهيت فقرتي إلا وأحاط بي الأصدقاء وهم يترقبون المكان بعيون حذرة ثم اقترح علي زميل جامعة القاهرة دهب إبراهيم دهب أن أغادر مباشرة إلى أي مكان آخر حتى لا أتعرض لأي مضايقات من أنصار الانقلاب فأحاط بي نفر منهم وغادرت الحفل إلى مباني جامعة السودان كلية الفنون… وأنا أغادر المكان لحقت بي زميلة الدراسة (سوسن) من حي امتداد الدرجة التالتة وهي تهمس في أذني (مصطفى سيداحمد قال عاوزك وقال ليك تجيهو في البيت) انتابني شعور بالسعادة من جراء ذلك وتملكتني غبطة نادرة وأشرت لها بموافقتي ثم غادرت مع أصدقائي… كان اليوم طويلا… وتفاعل الجمهور يفعل فعل السحر في وجداني… قضيت الساعات في كلية الفنون الجميلة ممتلئا بالفخر والرضا والحماس… وما أن أرخى المساء أولى ستاراته إلا وكنت أمام منزل الفنان مصطفى سيد أحمد وقد سرحت بخيالات الصبا في البعيد البعيد.
وأنا بانتظار مقدمه إلى حيث ولجت… كنت أهمس لنفسي أن الفنان مصطفى سيداحمد قد أعجبته قصيدتي دون شك بل.. لابد أنه سيشدو بها في القريب العاجل… أكثر من ذلك انتابني شعور باذخ بأنني سأشكل معه ثنائية فريدة تصدح بالثورة ضد العصابة وتشعل الأغاني سخطاً وحماساً ضد طاغوت الإخوان المسلمين… قطع حبل أفكاري حضور مصطفى سيداحمد مسرعاً حيث كنت أجلس… وقفت وعرفته بنفسي وإنني حضرت تلبية لرغبته في لقائي… صمت برهة.. ثم سألني هل أنا من ألقيت قصيدة نهار اليوم في حفل المكتبة القبطية فرددت عليه والفخر يملأ جوانحي (نعم).
فوجئت بالرجل وقد تغيرت لهجته وأصبح يتحدث بحزم واستنكار :
دا شنو العملتو دا؟
عاوز تصل لي شنو انت؟
دا نظام عسكري.. ح يدوك طلقة بس في رأسك دا… وح نكون فقدنا شاعر.. بس
لازم تخلي الطريقة دي… تحافظ على نفسك عشان تعمل التانية والتالتة.. بس بالطريقة المباشره دي وشتمهم ما ح يخلوك تعمل غيرا.
فوجئت بلهجة الرجل الحاسمة وطريقة تفاعله مع الحدث ولم أكن راضيا ولا مستعدا لذلك… استأذنته للمغادرة فاعتذر بلطف لكنه ردد على مسامعي.. ماعاوزين نفقد زول من المبدعين… ياريت تراجع نفسك ومانسمع عمل بذات الأسلوب… خرجت مندهشا وكثير الإحباط… ثم مرت سنوات ومياه كثيرة تحت الجسور… عرفت بعدها كيف كان يفكر الرجل في حكمته الأبدية.. وكم كان الفرق بيننا شاسعا في النضج والمسئولية… فأكمل رحلته ومشروعه الإبداعي بذات الوعي والحكمة ووقعنا نحن في أول فخ نصبه لنا جهاز الأمن فتم حظر أنشطتنا بجرة قلم بل واختفى للأبد أبوذر الغفاري ورحل الشهيد علي فضل بمسمار على رأسه.
اللهم ارحم مصطفى سيداحمد… واجعله رمزا للتنبؤ بمآلات الحال ومبدعا يستشف الزمان والمكان وينحت الصخر في حروب المستحيل.
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

كيكيات
عبدالكريم الامين
الخواجة الماسورة
عبدالكريم الامين..

ياخ حكاية غريبة، في شركة كده كنا نعافر الأرض لإنشاء شبكة صرف صحي في إحدى دواعيس تلك البلد الغميسة ومدورين بكل هارموني ونظام جينا الشغل لقينا المدير شالو ويوم يووومين جانا مدير خوواجة أصلي من عنق انجلند حيث المعرفة العميقة وسياد الشي ذاااتو..وبصراحة أنا شخصيا فرحت جدا كون المدير السابق كان حقااار وعامل فيها عشرة بقرش ولكن بصراحة بحقو لأنو الرجل بعرف أصول المهنية وعندو الكمونية الهندسية والذهن المرتب..وشالو ليه وكيف أنا مافي معلوم..المهم شالو..!
أها جووني ده جاء ومن أول يوم شبكنا ده ووبنو وداك ويينو وكان عصبي خلاص والمهم جبنا ليهو طلباتو القالها بسرعة وحماس وقلنا ايوووه ده الزيت وده الشغل أي دي الشعل ..فالشغل مع الخواجات عموما ممتع وبضيف للزول آليات وفنيات فرنجة نابحة تطور من حاجاتك المهنية وبتطور معرفتك بكارزيما الإنجاز..أها في نهاية اليوم خواجينا لم الناس وهرشهم وقال في ما معناه انتو كلكم بتورجغو ساكت ومن بكرة حيكون في نظام جديد وشديد فقلنا مرحب بالنظام الخواجاتي الرهبب..اها اليوم التاني جانا بدري خلاص وعندو جداول فيها ارتفاعات ومناسيب وإحداثيات طلعها هو براااهو رغم انو ده ما شغلو كمدير للمشروع..وقال بكل حسم وعنجهية بعد ده أنا الح اجهز الأشياء الفنية واانتو عليكم التنفيذ راسكم في كرعينكم…أها شلنا الداتا دي ودقشنا طرقات الدواعيس دي نوقع المناهيل واها يازول تخت جهازك وتربطو على نقطتين ضبط سليم وتجي توقع نقاط الخواجة الجابها دي تلقى النقطة بعييييييدة بعض مرات قدر ما تعافر تلقى المانهول واقع في لب البيت او على مسافة عدة كيلومترات من موقع المشروع بعييييد هناك…تراجع الجهاز وضبطو وتقول يا زول الخواجة ده ما بغلط وتراجع ساعة ساعتين في النهاية تلقى نقاط الخواجة دي داقشة الخلااا
مساح باكستاني اتصل علي وبمرح قال لي أنا سوي ترتيب مال مانهول ممكن مانهول هذا داخل بحرين.
المهم يازول رجعنا وخشينا للخواجة وقلنا ليهو كدي راجع شغلك ده يا مدير..فأرغى وأزبد وقال كلام شين بالانجليزي في انو انتو الفارات ديل تقولوا لي راجع شغلك وما فضل ليهو إلا يقول اااجي.!
المهم عملنا معاهو شمطة وجوطة لأنو سل لسانو..وقوووم يا كبير الاستشاريين اسمع العواء وجانا في المكتب..مالكم ..مالكم..
الخواجة قال لالا مافي حاجة بس الناس ديل عملوا مستيك وأنا بتكلم معاهم..
الاستشاري طلع تفتيحة وقال كدي جيبو المستيك ده نراجعو…قبل ما الخواجة ينضم كان اديناهو الورق الجابو الخواجة فورا..
اها الاستشاري مشوا راجعوا واكتشفو انو الداتا دي مخستكة…اها العملا منو العملا منو على وزن مكانا وين مكانا وووين…قلنا عملها المدير النحرير مستر جوني..
اها في نهاية اليوم داك الاستشاري طلع جواب رفض جووني يكون المدير وطردو من المشروع.. بعد سنين وكانت حكاية الخواجة الماسورة ده محيراني لقيت زول بعرفو قال لي جوني ده أساسا جاء البلد دي فني تصليح مراكب ويخوتات.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الرغيف ياحليلو.. بهدلو
قالوا بقى بالكيلو..كلكلو
طارق اللمين

????
خمسة كيلو الفتة
ولو كوارع ستة
حقو يعملو كنتة
الفول يكون بالدستة
عدلو
????
مافي تاني رغيفة
معاها شاي في زيفة
الناس دي خلت كيفا
وعدمت…… التعريفة
وبطلو
????
للفرن حصلنا
وقفنا واتعطلنا
ادانا بس نص كيلو
وقال نقيف نستني
يدخلو
????
الرغيف ما…. جنا
الوالي كان يسألنا
كيلو مين يا أهلنا
يكلكلوك في التمنة
حصلو
????
رغيفنا ود الهرمة
أخير يوزعو درمة
أو.. يكون بالقرمة
يدونا حتة وشرمة
عشان تجينا الخرمة
ويكتلو
????
الرغيف بالكيلو
مارأينا مثيلو
نظرة يا جاليلو
الوالي كاتل حيلو
حصلو
????
يارغيف.. اسمعنا
كيلو ليش واشمعني
جرام بيدي المعنى
وبراهو…ح يشبعنا
حولو
????
جرام رغيفنا الذهبي
ح يطفي ناري ولهبي
بس شن يودر ضهبي
وصفوف شقايا وتعبي
حللو
????
رغيفنا.. كالدولار
في كل يوم أسعار
والبورصة فيها شمار
خاتنو…… جوه النار
بلبلو
????
الرغيف… سبناهو
فتشنا.. مالقيناهو
تبنا……. بطلناهو
وأكلنا نيمنا براهو
سلسلو