شعر../ “خريف الدم”.. أزهري محمد علي
واتلاقينا في شارع القيادة العامة
من كل فجه وفرقة
فجينا الأرض ووقفنا
دي الوقفة التشوفها قيامة
م اراحت شمار في مرقة
بتزيدنا ونزيدا وسامة
يوم جرد الحساب بالورقة
حاسب نفسك اللوامة
حاسب والمتاريس درقة
والشجر البيمشي يمامة
عينو علي الرغيف والطرقة
وانت على المعاك يتامى
بينك والمشارع فرقة
والبحر الكبير دوامة
قول لحسين هناك في الشرفة
حمد لله الوصلنا سلامة
زي يوم الوقوف بي عرفة
والنَّاس الهناك أياما
شاهرين الهتاف سلمية
رافعين الأيادي علامة
اتنين بالكتير في المية
والباقي بنتمو شهامة
لو تصبر علينا شوية
والصبر إن كمل نتسامى
فوق كل الجراح الحية
والنار التذكي ضراما
ما بتعرف كلمة أحيا
والنضم الوراهو ملامة
والعمر البروح إيدية
هدر في مسخرة دعامة
ما بناخد فداهو الدية
ما بنقبل قصادو غرامة
نحنا على الفداء اتواعدنا
واتعاهدنا حب وكرامة
زي سرب القماري صعدنا
في لحظة وقوع الطامة
اتوسمنا خير وقعدنا
في جحر الأفاعي السامة
شن طعم القيادة بعدنا
شن معناهو طولة القامة
في القلعة المشيد سورا
قايلين الوراها نشامى
في ذاكرة شعوب محفورة
في صدر المعارك شامة
تبت دوشكتا المأجورة
تاكل من حلالا حراما
تتلامع سماحة صورة
وأولادنا بتموت قداما
يا عار القيادة العامة
***
الاعتصام رفة جناح اللهفة
في روح عبد السلام
روعة جسارة عظمة
والشهداء الكرام
عزم المتاريس العصية
ودقه أوتاد الخيام
الاعتصام
انفض في شارع القيادة العامة
لكن نبت في كل قطرة دم وقام
في كل بيت في كل قصة ثورة قدام
في كل شهقة وزفرة في صدورنا اعتصام
في كل شهيد صعد
عند الله محمود المقام
الليالي المالحة يا ليل المناحات
الدروب الفاتحة شريان البراحات
كانو في صدر القيادة
كما السنابل والرياحين
أحلامن أجنحة الفراشات
أرواحن أنفاس البساتين
متوسدين تعب السواعد الخضرا
و الأحلام قمم
هذه الأرض لنا
فليعش سوداننا علما بين الأمم
واا حسرة الأولاد
على حسرة نشيدك يا علم
انحل توب السترة
ونهدت عروض
في الساحه واتباعت ذمم
تبت أيادي القتلة
والعسس الرمم
يا للألم
يا للمصاب
من كل فج طلعت ذئاب
طلعت خبائث الأرض من تحت التراب
طلعت كتائب الظل وآلهة العذاب
طلعت نفوس متناس ويلات السؤال
عند الله في يوم الحساب
عتمة في عز الشروق
وكتمة في دم الشفق
وفجة يا رب الخلوق
وصرخة في أعلى النفق
وطعنة في ضهر البشاشات و الوسامة
وفطرة القلب السليم
وطعنة في الأذان
وفي صوت الإقامة
وحرمة الشهر الكريم
وطعنه لي يوم القيامة
بتحيا في غضب الحليم
وطعنة لا يلقاها إلا الذين صبروا
ولا يلقاها إلا ذو حظ عظيم
***
فيا درب الرجوع هيهات
ما فضل إلا القليل
ولسه في خاطرنا كلمات
من صباحات المواويل
لو بتغشى السدرة غنوات
كان عرج بي عازة الخليل
وكان بننسج للحبيبات
من خيوط الضو مناديل
المعاني بتخبو مرات
وتشتعل زي آية في الليل
ونحن شلنا عمرنا رايات
جيل يسلم راية لي جيل
ما استكان ليأس وسواس
وما استجاب لسؤال البديل
همو في الحرية والناس
والتزام الصبر الجميل
عندك خت ما عندك شيل
البعبوا الروح سماحات
ويمشوا بين الناس قناديل
وناس بزيدوا الهم مناحات
أرخبيل الدم وقابيل
الببادلوك العناق
ويرجموك في الليل أبابيل
ضحكة تحت اللح القناع
وكم غريق في لجة النيل
يبكوا بدموع التماسيح
ويمشوا في جنازة القتيل
***
ونحن عبرنا يا درب الخلاص وصّلنا
باقي من الغناء التلميح
وباقي من المعارك سِنة
ونان باقيلك اتبوهمنا ولا مِحنا
نحن برانا من كترت سُكاتنا خجلنا
يوم لاقينا مجنون ليلى
في شارع القيادة نصيح
ويا محبوبة ما فيك إنة
فيك سماحه الزمن الوسيم ومليح
ولا كانت مشاعرك مِنة
يوم رسلنا لي حضرة جنابو اجنا
أسرع من كلاب الريح
وانتي متلنا
ما شفتينا لما كتلنا
واتفرقنا ما بين شهيد وجريح
***
وما جيناك لي خت حِنة
جابتنا المآتم والنحاس الربة
آنات الهوا التبريح
جينا محبة
صبينا المتاريس صبة
وتعافينا من قُرح السرير القيح
كانت ذكرى
أحلام المدينة الفاضلة
سودان بكرة
أطياف الخيال والفكرة
والحب الكبير وصريح
سودان المعاني البِكرة
متعافي وسليم الفطرة
صارم وبالهداوة مريح
رنة الأجراس ونقرشة المديح
الرسومات الكمنجات المزازيك
لمة الأطفال على ضخب المراجيح
همهمات الباعة
والشعراء المطاليق
والشيوخ المارقة من عبق الضريح
البجردوا السبحة من أهل الطريق
التراتيل التسابيح
النِبال يا عازة الجبال
سلسبيل العدو والصليح
الزنوج الدم الحار
واللسان العربي الفصيح
في المآذن سطع الهلال
والظلال في الجمعة
صلبان المسيح
من أريج نسمات الشمال
قدلة في الوطن الفسيح
السجود في أرض المطار
الوداعات التلاويح
الحديد يا عطبرة النار
التذاكر والتصاريح
والعجب يوم وقف القطار
***
واشتعلنا مع المصابيح
النضال ومواقف الرجال
السِجال والساسة الجُداد
المعايش وسترة الحال
الغناوي وعقد الجلاد
الجدال في الجد والهظار
التهجد والتراويح
بكرة يصبح كلو قول قال
وما بصح إلا الصحيح
المواجع والدم السال
وكم سؤال في قبضة الريح
كم صباح في الأفق البعيد
***
الواحدة ميقات التجلي
ميقات صعود الثورة
في هرم المواعيد
زغرودة والشارع يقوم
وتبدا الملاحم بالزغاريد
من وين بنبداها الحكايات
يا حرفنا المختصر المفيد
أنفض حيل الكلمة
وانفضت ملمات
يا دمنا المسفوح قبائل العيد
نتلاقى في وهج البشارات
والمعاني الخالدة في بيت القصيد
دقت النوبات ودندنة الأناشيد
للولاد المارقة حوبات
الشهيد تلو الشهيد
وَيَا خريف الدم سلامات
نحنا بي موتنا بنزيد
والبموت شان وطنو ما مات
بتولد من أول جديد
جينا من رحم البسالات
جونا من برا الأجاويد
خلينا بالنا على البلاد
ختولنا في الجرح المراويد
جات كلاكلات إيد على إيد
بري شمبات المسيد
جبرة وأمدر
والحشود المارقة من كبري الحديد
إنت بتكيد والشعب يفعل ما يريد
يحيا الكفاح وينبغي
وتسقط كتائب الجنجويد
تسقط كتائب الجنجويد
